स्थानीय सरोकार/चरिकोट । दोलखाको प्रसिद्ध ‘यलुङ रि’ हिमाल क्षेत्रमा गएको भीषण हिमपहिरोले ठूलो जनधनको क्षति पुर्याएको छ। प्राप्त विवरणअनुसार तीनजनाको मृत्यु भएको छ भने आठ जना अझै बेपत्ता छन्।
दोलखा जिल्लाको रोल्वालिङ उपत्यकास्थित यलुङ रि हिमालमा गएको हिमपहिरोमा परेर तीन जनाको ज्यान गएको छ भने आठ जना अझै बेपत्ता छन्। जिल्ला प्रहरी कार्यालय दोलखाका प्रमुख डिएसपी ज्ञानकुमार महतोका अनुसार घटनामा चार जना घाइते भएका छन्।
नेपाली गाइडसहित १५ जनाको आरोहण टोली सोमबार बिहान नाँ गाउँबाट यलुङ रि हिमालतर्फ प्रस्थान गरेको थियो। आरोहणका क्रममा उनीहरू ५ हजार ६ सय ३० मिटर अग्लो शिखर नजिकै पुगेका बेला आकस्मिक रूपमा हिमपहिरो खस्दा दुर्घटना भएको प्रहरीले जनाएको छ।
प्रहरीका अनुसार बेपत्ता र घाइतेहरूको खोजी तथा उद्धारका लागि हेलिकोप्टर परिचालन गरिएको भए पनि खराब मौसमका कारण उद्धारकार्यमा कठिनाइ आइरहेको छ।
स्थानीयका अनुसार पर्वतारोहणका लागि गएको समूहमा विदेशी र नेपाली दुवै नागरिक थिए। खराब मौसमका कारण उद्धार कार्यमा कठिनाइ भइरहेको बताइएको छ। नेपाली सेना, सशस्त्र प्रहरी र स्थानीयको सहयोगमा खोज तथा उद्धार कार्य जारी छ।
विशेषज्ञहरूले हालैको तापक्रम परिवर्तन, लगातारको हिमपात र चिसो हावाका कारण हिमपहिरोको जोखिम बढेको बताएका छन्। जलवायु परिवर्तनका कारण उच्च हिमाली क्षेत्रमा यस्तो जोखिम बढ्दै गएकोमा विज्ञहरूले चिन्ता व्यक्त गरेका छन्।
यो दुःखद घटनाले नेपालको हिमाली पर्यटन क्षेत्रमा सुरक्षा व्यवस्थाको पुनरावलोकन र पर्वतारोहण अनुमति प्रणालीमा सुधारको आवश्यकता स्पष्ट देखाएको छ। भविष्यमा यस्ता दुर्घटना न्यूनिकरणका लागि पूर्वसूचना प्रणाली, मौसम निगरानी र पर्वतारोहण सुरक्षामा लगानी बढाउनु अत्यावश्यक देखिन्छ।
