निगरानी ब्यूरो ।ओमानमा कार्यरत २० जना नेपाली एकै पटक साइबर ठगीमा संलग्न भएको अभियोगमा पक्राउ परेर देश निकाला भएका छन्। विदेशमा रोजगारका लागि गएका नेपाली युवाहरू आपराधिक क्रियाकलापमा संलग्न भएको समाचारले देशको श्रम प्रतिष्ठामाथि गम्भीर प्रश्न उठाएको छ।
साइबर अपराध विश्वव्यापी समस्या बन्दै गएको छ। प्रविधिको सहज पहुँचले अवसरका ढोका खोलेको छ भने दुरुपयोगले बदनामी पनि बढाएको छ। वैदेशिक रोजगारमा गएका केही नेपालीले सजिलो कमाइको लोभमा साइबर ठगीजस्ता अपराधमा हात हालेका घटना बढ्दै छन्।
दूतावासका अनुसार ओमानबाट निकालिएका ती नेपालीहरू नेपालबाट दुबई भिजिट भिसामा गएका र त्यहाँबाट चाइनीज कम्पनीमार्फत रोजगारको आशामा भिजिट भिसामा ओमान पुगेका थिए।
गत फेब्रुअरीको अन्त्यतिर ओमान पुगेका उनीहरूलाई कम्पनीले विभिन्न डिजिटल माध्यम प्रयोग गरी अनलाइन लगानी, सामाजिक सञ्जालमार्फत ठगी गर्ने, नक्कली बैंक वेबसाइट र मनोरञ्जनका च्याट एपमार्फत पैसा उठाउने कार्यमा प्रयोग गरेको थियो।
यसले न केवल तिनको व्यक्तिगत भविष्य जोखिममा पार्छ, बरु सम्पूर्ण नेपाली श्रमिक समुदायको छविलाई पनि धुमिल बनाउँछ।
राज्यले विदेशमा रहेका श्रमिकहरूको व्यवहार र अनुशासनमा ध्यान दिनुपर्छ। त्यस्तै, वैदेशिक रोजगारमा जाने युवालाई प्रविधि प्रयोगका नीतिगत प्रशिक्षण र कानुनी सचेतना दिनु आजको आवश्यकता हो। नेपाली दूतावास र समुदायले पनि आपसी समन्वयमा यस्ता गतिविधि नियन्त्रणका उपाय अपनाउनुपर्छ।
साइबर अपराधबाट देशको साख जोगाउन शिक्षा, चेतना र जिम्मेवारीपूर्ण व्यवहार नै प्रमुख हतियार हुन्।
