काठमाडौं, ४ साउन । पूर्वराष्ट्रपति विद्यादेवी भण्डारीले आफूले एमालेको पार्टी सदस्यता नवीकरण गरिसकेको स्पष्ट पारेकी छिन् ।
एमाले अध्यक्ष तथा प्रधानमन्त्री केपी शर्मा ओलीसँग च्यासलको भेटवार्ता सकिएपछि मिडियाकर्मीहरुसँग घेरिएकी भण्डारीले पार्टी सदस्यता नवीकरण भैसकेको दाबी गरेकी हुन् ।
तर, ओलीसँगको भेटवार्तामा भने यो विषयमा आज कुराकानी नभएको उनको संक्षिप्त प्रतिक्रिया थियो ।
उनले भनिन्,‘पार्टी सदस्यता नवीकरण भैसक्यो, तर आज यो विषयमा कुराकानी भएन । आज त राष्ट्रिय राजनीतिको विषयमा छलफल भएको हो ।’
अध्यक्ष ओली भने प्रतिक्रिया नदिईकन हिँडेका थिए । दुई नेता बैठक कक्षबाट बाहिरिने क्रममा एकदमै हर्षित मुद्रामा निस्किएका थिए ।
