काठमाडौँ । नेपाल आयल निगमका कार्यकारी निर्देशक चण्डिका भट्टले बिदाको दिन सरकारी सवारी प्रयोग गरी कलंकीको डिभाइडरमा ठोक्काएको घटना सामान्य दुर्घटना मात्र होइन । सार्वजनिक पदमा रहेका व्यक्तिको जिम्मेवारी र आचरणमाथि गम्भीर प्रश्न उठाउने विषय हो। राज्यले उपलब्ध गराएको स्रोत साधन व्यक्तिगत सुविधा वा गैर–आवश्यक प्रयोजनका लागि प्रयोग गर्नु नैतिक रूपमा अनुचित मात्र होइन । कानुनी रूपमा पनि प्रश्नयोग्य हुन्छ।
सार्वजनिक पदमा रहेका व्यक्तिहरूले आफ्नो भूमिकाप्रति उच्च स्तरको अनुशासन र पारदर्शिता देखाउनुपर्ने हुन्छ। अझ, बिदाको दिन सरकारी गाडी चलाउनु र त्यस क्रममा दुर्घटना हुनु भनेको जिम्मेवारीप्रति लापरबाहीको संकेत हो। यस्तो व्यवहारले राज्य संयन्त्रप्रति जनविश्वास कमजोर बनाउँछ।
यो घटना केवल व्यक्तिगत गल्तीका रूपमा टार्न मिल्ने खालको छैन। यसले सरकारी सम्पत्तिको दुरुपयोग, सुरक्षा मापदण्डको बेवास्ता, र नेतृत्व तहको उत्तरदायित्वबारे गम्भीर बहस आवश्यक बनाएको छ। यदि उच्च पदस्थ व्यक्तिहरू नै नियमभन्दा माथि रहने प्रवृत्ति देखाउँछन् भने, तल्लो तहमा अनुशासन कायम हुने अपेक्षा गर्नु कठिन हुन्छ।
सम्बन्धित निकायले यस घटनाको निष्पक्ष छानबिन गरी सत्यतथ्य सार्वजनिक गर्नुपर्छ। दोषी देखिए आवश्यक कारबाही हुनुपर्छ र सरकारी स्रोतको प्रयोगसम्बन्धी स्पष्ट मापदण्ड कडाइका साथ लागू गर्नुपर्छ। पारदर्शिता र उत्तरदायित्व बिना सुशासन सम्भव छैन।
अन्ततः यस्ता घटनाबाट पाठ सिक्दै सार्वजनिक पदमा रहेका व्यक्तिहरूले आफूलाई नियमभित्र राख्ने संस्कार विकास गर्नु आजको आवश्यकता हो। जनताले अपेक्षा गरेको सुशासन केवल भाषणमा होइन, व्यवहारमा देखिनुपर्छ।
